【清要論政】《懶人》

基督教中有七原罪之說，其中之一是懶惰。按常理推斷，懶人不事生產，然而作為懶人，我想指出，懶人只是貪方便，不方便就不為之，假如方便的話，就會見到這個懶人非常積極勤勞，並不是不事生產。

何為貪方便？你按個掣就有電視睇，算唔算方便？但要你下載apps，搞一大輪先有香港電視睇，方唔方便？於是網絡熱話，都係圍繞《東張西望》震撼性聲音、杜如風好臭寸等等議題，偶爾間，你才會聽到少數人談論《來生不做香港人》，然後鬧無線製作，是是但但。在科技發達的這個年代，難道開電腦、打個網址或按個bookmark掣，電視或平板電腦按個app睇香港電視，有這麼難嗎？

難啊。否則何謂慣性收視？懶人就是安於現狀，因為習慣了，我們慣性動作按個遙控器，就開始睇電視，然後隨便按個掣，轉台、睇節目表；但香港電視呢？只是多了一、兩個步驟，就少了很多人睇，皆因習以為常。

或許正在讀這篇文章的你會說：「你懶啫，你代表到全香港咩？」首先，主觀一定係主觀；然後，我冇講過我代表全香港，我只係作為懶人一份子，道出有些人（比如我自己）寧願懶，都不追看網絡電視罷了，反正其他娛樂消遣多的是。

那麼，撇開電視不談，講講最常接觸的，比如Facebook，遠至換上黃絲帶作頭像，近至用粉筆花做頭像，聊表了一份心意，這是不是很方便呢？按個Like，按個Share，說兩句，彷彿已用盡這一生的氣力掙扎求存；到近日，則變成「我是查理」，但似乎只有很少人關注本土的「查理」──黎智英。想當日劉進圖遇襲，到今日黎智英被掟汽油彈，在這個以言入罪的社會，你覺得你被襲擊的時日，還會遠嗎？